20200921 Actividades Deportivo Culturais 2020 21O Concello de Rois mantén aberto ata o 30 de setembro o prazo de inscrición para un amplo e variado programa de actividades deportivas e culturais, dirixidas tanto a maiores como aos máis novos. En cumprimento coa normativa derivada da crise sanitaria da Covid-19, a oferta de actividades adáptase ás circunstancias actuais, sendo obrigatorio o uso de máscara e desenvolvéndose as propostas en grupos reducidos.

As persoas interesadas deberán anotarse nas oficinas municipais ou no multiúsos antes do mércores 30, pois as clases comezarán o luns 5 de outubro, unha vez que se conformen os grupos. A maioría das actividades impartiranse en Rois e Urdilde.

Actividades deportivas para adultos

As actividades deportivas para adultos inclúen zumba (40 €/curso), pilates (60 €), ioga (40€) e ximnasia de mantemento para maiores de 55 (40 €). O polideportivo municipal de Rois acollerá estas clases, mentres que en Urdilde zumba, pilates e ioga se celebrarán no ximnasio do CEIP do Pumar e a ximnasia de mantemento farase no polideportivo municipal. A maiores, o Concello ofrece a actividade de  acondicionamento físico (40 €) no ximnasio municipal dos Dices, cun número de prazas limitado ao aforo.

As persoas que opten por zumba e pilates pagarán só 65 € por todo o curso, e aquelas que escollan ximnasia para maiores de 55, pilates e zumba, pagarán 95 euros o curso completo.

Escolas deportivas municipais para escolares

A oferta deportiva para os máis novos do municipio inclúe patinaxe artística (4 a 16 anos, 50€), tenis (50 €), ximnasia rítmica (50€) e judo (3 a 16 anos, 70 €); todas elas impartiranse nos polideportivos de Rois e Urdilde.

No referido á actividade de xadrez (50€), poderá realizarse tanto de xeito presencial (no edificio multiúsos de Rois ou nos equipamentos municipais de Urdilde) como en liña, en cuxo caso non hai límite de participantes.

As escolas deportivas municipais contarán este ano cun máximo de 14 participantes por grupo. Con respecto a cursos anteriores, deixan de ofertarse actividades que implican o contacto físico, como o fútbol sala ou o baloncesto.

Os nenos e nenas que se matriculen en dúas actividades terán un 25% de desconto na matrícula da segunda actividade. No caso de varios irmáns, haberá un 50% de desconto par ao segundo e sucesivos irmáns ou irmás que se matriculen nas escolas deportivas municipais.

Actividades culturais e formativas

No eido cultural e formativo, o Concello ofrece clases de artes plásticas e creativas a cargo de Camilo Seira (30€/trimestre), con grupos a partir dos 3 anos ata a idade adulta. Tamén haberá clases de inglés a partir dos 3 anos (30€/mes), grupos de animación á lectura e o contacontos Arro-Rois para familias con crianzas de 0 a 3 anos (30€/curso), unha actividade de deseño de videoxogos (30€/trimestre) e clases de teatro do grupo municipal Vacalouras para escolares e adultos (30€/trimestre).

Outras actividades formativas para adultos son as clases de informática (30€/curso), xestións administrativas para a cidadanía a través da sede electrónica, teléfono móbil (30€/curso), micoloxía ou poda e inxertos.

Ademais, a Escola Municipal de Música de Rois ofrece este curso formación nos seguintes instrumentos: guitarra, acordeón, trompeta, saxofón, clarinete, batería, piano, violín, frauta, fagot, óboe, tuba, contrabaixo, trombón e combo.

Inscrición

O inicio destas actividades está condicionado á evolución da crise sanitaria da Covid-19, e calquera modificación do programa será comunicada a través da páxina web e do Facebook do Concello de Rois.

Para información e inscricións, as persoas interesadas poden dirixirse ao Concello de Rois (981 81 41 09) ou ao edificio multiúsos (981 81 60 61), nos horarios que figuran no tríptico informativo. Tamén se achegan nesta nova as fichas de inscrición (infantil e adultos), que deberán entregarse antes do 30 de setembro. A reserva de prazas, no caso de existir límite, realizarase por rigorosa orde de inscrición.

  • 'Cultura en familia' presenta seis espectáculos en outubro no auditorio municipal dirixidos á infancia

  • Dúas comedias trepidantes e un espectáculo de pompas de xabón con moito humor conforman o programa 'Teatro en Rois'

20200917 teatro

 

O outono chega cargado de novidades e espectáculos teatrais para a veciñanza de Rois, que poderá gozar de ata seis funcións familiares en outubro e doutras tres funcións entre outubro e decembro.

Compañías e grupos de recoñecido prestixio en Galicia, como Mamá Cabra, Xoán Curiel ou Teatro Calavera, entre outras, actuarán no auditorio municipal de Rois, que contará con todas as medidas de seguridade ditaminadas polas autoridades sanitarias. Con aforo limitado e inscrición previa, os programas Cultura en familia e Teatro en Rois contan co apoio da Rede Cultural da Deputación da Coruña, Agadic, a Rede de Bibliotecas Públicas de Galicia e a Rede de Dinamización Lingüística.

'Cultura en familia'

O programa cultural familiar abrirá coa actuación de Mamá Cabra o sábado 26 de setembro ás 18.00 h. O grupo pioneiro especializado en música infantil galega ten unha traxectoria de dúas décadas nos escenarios e conta cun nutrido e fiel grupo de seguidores entre a cativada.

O venres 2 de outubro, tamén ás seis da tarde, Teatro Calavera presentará a obra Antón e Tomasa: a cabaza encantada, un contacontos dirixido a nenos e nenas de 4 a 8 anos que remata cun obradoiro de cociña. Ao día seguinte, o sábado día 3, Barfunda Teatro porá sobre as táboas O censor de monstros. Este é Cristovo, que grazas ao seu traballo tan especial compartirá co público os seus coñecementos sobre os seres fantásticos que habitan en Galicia.

Xoán Curiel e a Banda do Verán aterrarán no auditorio o venres día 9 para interpretar os temas do libro-CD A Casa do Terror. A actuación será tamén ás seis da tarde. Á mesma hora, o mércores 21 de outubro a compañía Xarope Lulú presentará Bichocas, un espectáculo dedicado á primeira infancia no que os obxectos e a palabra farán viaxar a través do mundo animal aos pequenos e pequenas de 0 a 3 anos.

Por último, o sábado 24 de outubro ás 12.00 horas Os Bolechas estarán tamén en Rois. Haker Mater, un programador informático, está a poñer a punto a Porta dos Camiños, unha máquina que lles axuda a elixir un dos moitos Camiños de Santiago ás persoas que queren peregrinar pero non saben por que vía facelo. Haker Maker precisará da axuda dos Bolechas e do público na súa misión.

'Teatro en Rois'

Running unha comedia vertixinosa e suorenta a cargo de De Ste Xeito Producións, abrirá o telón do Teatro en Rois o sábado 10 de outubro ás 20.00 h. Stephy Llaryora e Sergio Macías terán que suar a camiseta para meterse na pel de Xulia e Román e de todas as personaxes que pasarán polo escenario: fillas e fillos de parellas anteriores, nais divorciadas, avós na residencia, adolescentes co pavo, o pequeno coa crise dos 8, os grandes coa dos 40, os 50 e os 60, as clases de ioga, de patinaxe de danza-jazz, os deberes da escola e o resto de deberes... coidar de todo e de todos menos dun mesmo.

O público familiar terá unha nova cita cultural o venres 11 de decembro cun espectáculo de pompas de xabón a cargo de Malasombra Teatro. Na súa obra Os Fabulosos Cleaners, dous operarios da limpeza do teatro descobren por casualidade as posibilidades que lles ofrecen as súas ferramentas de traballo combinadas con auga e xabón: pompas e burbullas transparentes, con fume, con vapor, pequenas, grandes, estáticas... O espectador camiñará da man destes personaxes por un mundo máxico cheo de cor e de humor.

A última das actuacións previstas é a de Teatro Badius, que o sábado 12 de decembro ás 20.00 h. representará A peregrinaxe, un espectáculo para todos os públicos. Trátase da historia dun humilde pastor que, por orde de Deus, debe partir cara á terra de Godah. Emprende entón unha longa peregrinaxe na que se enfronta a banqueiros e gladiadores, coñece a César e a Cleopatra e vive moitas outras aventuras ata rematar na última cea de Xesús.

Protocolo covid-19

A posta en marcha das actividades está supeditada ao protocolo e á evolución da crise sanitaria da covid-19, polo que os programas son susceptibles de cambios.

Ademais, a participación require inscrición previa e a reserva de prazas realizarase por rigorosa orde de inscrición. Para información e reservas, é preciso chamar ao o edificio multiúsos de Rois (981 81 60 61) neste horario: luns, mércores e venres de 10.00 a 13.00; luns de 17.30 a 20.00; e de martes a venres de 16.00 a 20.00 horas.

  • Amigos e veciños arrouparon a familia na misa-homenaxe a quen foi, en palabras do alcalde, “un mestre en toda a extensión da palabra”

  • Asistiron ao acto a viúva, os fillos e os netos, así como autoridades municipais e os directores dos centros educativos do municipio

 

20200829 01 Homenaxe Don Joaquin Nuñez web

Arredor de cen de persoas reuníronse esta mañá no polideportivo de Urdilde para recordar a figura de don Joaquín Núñez Castro, mestre e director do colexio local durante case corenta anos e falecido o pasado mes de xullo. O alcalde de Rois, Ramón Tojo Lens; o tenente de alcalde, Manuel dos Santos; e a presidenta da Asociación de Mulleres Rurais de Urdilde, María Teresa Martínez, acompañaron na misa-homenaxe á viúva e aos familiares do finado. Tamén estiveron presentes os directores dos centros educativos de Rois e Urdilde, Ana Lamela e Benito Barrantes.

Cándida Sabarís e os fillos da parella, Xaquín e Alberto, recibiron o cariño da veciñanza, sequera simbólico, nun acto marcado polas precaucións sanitarias ás que obriga a pandemia de Covid-19. Participaron na misa-homenaxe arredor dun cento de persoas para un recinto cun aforo máximo de 250, coa colaboración de efectivos de Protección Civil, que dispensaron xel hidroalcólico para toda a concorrencia e velaron polo cumprimento das normas. “Nestas circunstancias, temos que aprazar os bicos e os abrazos, pero a presenza de tanta xente seguro que reconforta a familia”, apuntou na presentación do acto o tenente de alcalde, Manuel dos Santos. O cura de Urdilde, Juan Montero, oficiou a eucaristía, acompañado polo párroco de Meis (de onde era natural don Joaquín), Manuel Santa María.

O alcalde, Ramón Tojo, cualificou a Núñez Castro de “mestre, en toda a extensión da palabra”. “Don Joaquín merecía esta homenaxe, era moi querido en Urdilde”, lembrou Tojo, recordando a amizade do falecido co seu propio pai. “Sempre tiña tempo para os alumnos e para o centro”, destacou.

Neste mesmo sentido expresouse María Teresa Martínez, presidenta das Mulleres Rurais de Urdilde e exalumna ela mesma de Joaquín Núñez. “Humilde mestre, director, veciño e amigo”, dixo, “aprendeunos os valores da entrega, do traballo e do respecto neste centro que temos ao lado. Todos os que pasamos por aquí sentimos que formamos parte dunha familia”. Quixo recordar que don Joaquín organizaba para o alumnado “viaxes a lugares que daquela poucos coñeciamos e festivais fin de curso inesquecibles”. “Sentimos por el o mesmo respecto que el nos tiña a nós”, finalizou.

O acto rematou coa entrega dun retrato de Joaquín Núñez aos seus familiares. O seu fillo Xaquín pechou a misa-homenaxe expresando, de parte da familia, a “emoción e inmensa gratitude por este acto e polas mostras de consideración que recibimos, non só agora, senón desde que meu pai chegou aquí hai cincuenta anos”. “Cando xa estaba moi enfermo” desvelou, “meu pai quería vir a Urdilde a celebrar a amizade e a evocar anos felices. Dentro da dor, consola saber que viviu rodeado de afecto. El gozou da súa profesión e participou da comunidade, e nós nunca esqueceremos tanto aprecio. Por sempre e para sempre, moitas grazas”.

Máis fotos da misa-homenaxe, neste álbum do Facebook do Concello de Rois.

20200912 Seira web

20200912 Seira 5bA pasada fin de semana levouse a cabo a visita guiada ás obras artísticas produto da segunda edición do Land Art Seira, unha homenaxe á natureza desde o prisma da arte.

Camilo Seira, exerceu de guía nas visitas, e con moito agarimo e pausa foi explicando cada unha das obras realizadas pola vintena de artistas de diversas disciplinas (artes plásticas, música, arquitectura, deseño...) que asistiron este ano ao encontro. Se ben decir que aínda estaba en pé algunha obra da anterior edición.

Camilo explicou en detalle o proceso de creación de cada unha das obras, a inspiración dos e das artistas participantes e os resultados obtidos. “Era emocionante ver unha vintena de adultos durante unha xornada manipulando o medio natural, concentrados cada un na súa creación, obviando calquer outra variable allea ao seu proceso creativo, como nenos, unha imaxe moi rara de ver nos nosos días”, di o artista.

Camilo Seira explica de inicio a adaptación da filosofía Land Art a este evento. Land Art orixinouse nun grupo de artistas, especialmente  europeos e americanos, que buscaban a intervención no contorno natural deixando a súa pegada, a súa arte na natureza co propósito de lograr unha arte non comercial. Land Art Seira ten un sentido diferente, xa que as obras resultantes non pretenden dimensións que compitan coa natureza, senón que busca unha harmonía con esta, amosando respecto e baixo unha única pauta: empregar o que ofrece o medio para crear arte, pero sen perturbalo. O resultado: esculturas feitas con ramas, pedras, lama, bosta, flores, follas, tintes de froitos... “A idea é que as obras se integren, se vaian degradando no seu entorno, ao igual que fan as follas que caen das árbores”, explica o artista.

O artistica explica que o encontro supuxo unha homenaxe a aqueles traballos do campo, duros, moi duros, pero variados e satisfactorios, que se facían antigamente e que hoxe, só perduran nas lembranzas. Aquela forma de vida autosuficiente, renovable e que non creaba residuos. O encontro quixo recrear ese ambiente de traballo no exterior, no aire libre, que xeraba tanta saúde corporal e paz mental.

A iniciativa veu da man de Camilo Seira, Andreas Ruiz, Sandra Villaverde e estivo organizada  en colaboración coa organización Catro Gatos, con Inés Silvalde e Delio Sánchez ao fronte. O Concello de Rois colaborou cunha bolsa para gastos do evento e o financiamento do catálogo que se publicará coas imaxes das pezas, así como na coordinación destas visitas guiadas.

'Voa, voa!' de Talía Teatro

20200913 Talia 1Talía Teatro, compañía moi querida na nosa terra, puxo en escena o domingo 13 de setembro Voa, voa! Un espectáculo dirixido especialmente ao público infantil, pero con moitos guiños ás persoas adultas. Na representación puidemos coñecer a Xoana (María Ordóñez), que todas as tardes baixa ao parque despois de merendar. Alí coincide con Anxo (Toño Casais), un neno introvertido que prefire as pantallas pero que pouco a pouco vai entrando nos xogos que lle propón Xoana, todos aqueles xogos e cantos que lle ensinou súa avoa.

Con delicado guión e dirección de Artur Trillo, a montaxe propón divulgar e relembrar a arte de xogar coas palabras, os ditos, retrousos, xogos de man que se manteñen de xeración en xeración de forma oral.

Unha fermosa historia, con trasfondo social sutil, que emociona e que nos fixo saír co corazón tremendo do espectáculo.

Espectáculo a través da Rede Cultural da Deputación da Coruña.

'Cantacontos' de Migallas Teatro

20200912 MigallasMaría dos Contos e o Señor Dorremí, fixéronnos gozar o pasado sábado dos contos tradicionais e dos de creación propia, arrequentados con cancións, música, sons… e algo de ruído. Que ben o pasamos, cantando e contando con estos dous grandes artistas!

Espectáculo de animación á lectura realizado a través do programa Ler conta moito da Xunta de Galicia, programa de dinamización da lectura que ofrece ás bibliotecas públicas da Rede a través do seu catálogo actividades de distintas categorías coas que achegar á cidadanía á lectura e á información dunha maneira lúdica e atraínte .

 

  • O Setembro Cultural propón teatro para público familiar e cinema-coloquio

  • A Cultura Dispersa por Rois continúa a levar actuacións ás parroquias do municipio

  • Camilo Seira dirixirá as visitas guiadas á mostra de Arte e Natureza en Seira

 

20200827 cultura setembro

A cultura toma impulso en Rois coa chegada do mes de setembro. Tres programacións (Setembro Cultural, A Cultura Dispersa por Rois e Arte e Natureza en Seira) enchen o calendario de propostas pensadas para gozar da arte, do teatro e do cinema, cumprindo todas as medidas de seguridade e hixiene debidas á pandemia de coronarivus.

O Concello de Rois busca a maior seguridade posible para os espectadores que asistan a estas iniciativas culturais. Por isto, para as actividades de Setembro Cultural e as visitas de Arte e natureza en Seira é preciso anotarse escribindo a Este enderezo de correo está a ser protexido dos robots de correo lixo. Precisa activar o JavaScript para velo. ou chamando ao 981 816 061 en horario de mañá.

Teatro e cinema no Setembro Cultural

O Setembro Cultural leva a Rois teatro para a cativada e cine do país. Os nenos e nenas teñen cita no Auditorio Municipal (18h) con tres espectáculos a cargo de compañías cunha gran traxectoria. O sábado 12, Migallas Teatro porá sobre as táboas o musical Cantacontos, baseado en historias tradicionais musicadas para público de entre 4 e 11 anos. O domino 13 será Talía Teatro a que interpretará a obra familiar Voa, voa!, unha proposta para gozar da palabra e a divulgación. Xa o sábado 26 será o momento do grupo Mamá Cabra, un dos conxuntos de música infantil máis populares de Galicia, cunha montaxe especial sobre alimentación saudable titulada Eu cociño, ti cociñas.

Canto ao cinema, o director Ignacio Villar asistirá o sábado 19 ás 21h á proxección, no campo da festa de Urdilde, do filme María Solinha. En caso de choiva, a película pasarase no Auditorio Municipal de Rois.

O aforo será limitado en todas as actividades, polo que a inscrición previa obrigatoria abrirase o luns día 7. Setembro Cultural conta co apoio da Rede Cultural da Deputación, Agadic, a Rede de Bibliotecas de Galicia e a Rede de Dinamización Lingüística.

A cultura dispersa por Rois

En setembro continúa a programación que leva polas parroquias do municipio espectáculos de teatro de pequeno formato e filmes ao aire libre. O domingo 6, Dinamo Producións porá en escena Eu queríame casare no campo da festa de Ermedelo (13h). Trátase dunha comedia sobre o amor aos corenta, protagonizada por Lucía Veiga e Pedro Brandariz. O sábado 19 será Avelino González o que contará Contos que foron chistes no campo da festa de Ermedelo (19h), peneirando historias na tradición humorística galega. Por último, o campo da festa de Sorribas acollerá o día 20 (21.30h) a proxección da película de humor Superlópez, dirixida por Javier Ruiz Caldera e protagonizada por Dani Rovira.

A proposta A cultura dispersa por Rois conta coa colaboración das comisións de festas e das asociacións do termo municipal. Ademais, a maior parte das actividades teñen o apoio da Deputación da Coruña, a través da súa Rede cultural.

Arte e natureza en Seira

Para completar a oferta do mes de setembro, o escultor e pintor Camilo Seira será o encargado de dirixir tres visitas guiadas pola exposición da II Xornada da Arte e Natureza, aberta na contorna natural de Agro do Souto como homenaxe aos maiores do municipio falecidos neste dramático 2020. Unha vintena de creadores plásticos, músicos, arquitectos e deseñadores empregaron materiais naturais para montar a mostra.

Camilo Seira fará un percorrido explicado polas obras os días 11, 12 e 13 de setembro (o venres ás 18h e sábado e domingo en dobre quenda de 12 e 18h). Os grupos van ter un máximo de 20 persoas, polo que é preciso anotarse a partir do xoves 3 de setembro.