• A medida afecta ás clases de inglés, ás de teatro e ás de arte creativa

  • Na Escola Municipal de Música suspéndense as clases colectivas

  • Tómase a decisión polo incremento das restricións e o empeoramento da situación pola covid-19

 20210114 suspension actividades culturais

O Concello de Rois decidiu cancelar todas as actividades educativas e culturais promovidas polo propio concello para contribuír, deste xeito, a loita contra á covid-19, e por causa das novas restricións aprobadas pola Xunta  que entrarán en vigor esta medianoite.

A medida adoptada polo Concello de Rois afecta ás clases de inglés, ás de teatro e ás de arte creativa que impartía Camilo Seira, que quedan suspendidas dende hoxe mesmo. Tamén se cancelas todas as clases colectivas da Escola Municipal de Música (música en movemento, linguaxe musical, harmonía e creación musical, e grupo instrumental/combo). As clases individuais da Escola de Música séguense impartindo nos horarios habituais. A intención do equipo de goberno é recuperar estas actividades en canto mellore a situación sanitaria provocada polo coronavirus.

Dende o Concello piden comprensión ás familias e persoas afectadas. “Nestes momentos tan complicados, e coa incidencia acumulada pola covid-19 medrando a diario, entendemos que suspender estas actividades, nas que participan moitas persoas, sobre todo menores de idade, é unha medida prudente para contribuír a erradicar esta pandemia”, sinala a concelleira de Cultura, Victoria Quiroga.

Coma calquera afeccionado, Martín Bouzas vivirá desde a súa casa o comezo da temporada de ciclismo a finais deste mes. Tres veces campión de España de contrarreloxio, o ciclista de Rois sorprendía en outubro co anuncio da súa retirada con tan só 22 anos e xusto cando se atopaba no seu primeiro ano como profesional enrolado nas filas do Kern Pharma.

“Terei un pouco de morriña despois de tanto tempo dedicándome ao ciclismo, pero teño claro que a decisión a tomei polo meu ben, porque non me atopaba a gusto”, comenta Martín, agora centrado en estudar oposicións para entrar en Correos. “A miña vida cambiou completamente. Antes, por exemplo, só podía parar ao mellor un día cada dúas ou tres semanas. Pero non eran só as horas de bici, senón tamén todas as rutinas que impón o ciclismo: o descanso, a alimentación, etc.”, subliña.

Todos estes atrancos que non lle deixaban desfrutar da bicicleta contounos o propio Martín nunha carta que publicou a xeito de despedida o pasado mes de outubro e que pode lerse na web do Kern Pharma. Nela fala da presión psicolóxica á que se sometía el mesmo, a obriga que se impuña de responder ás expectativas depositadas nel ou a ansiedade que lle provocaban as carreiras e facía que adoecese pola comida.

O problema de Martín, tal e como lle recoñecía naquel momento a El Confidencial, era ter que facer algo para o que estaba dotado pero que non lle satisfacía. “É unha decisión que madurei durante case un ano. Non me sentía ben co que facía, non era feliz, así que decidín cambiar de rumbo, deixalo para sempre”, recolle o xornal.

Tres meses despois, afirma que a constancia á que estaba obrigado pola competición axúdalle a preparar as oposicións. “Ao principio custoume poñerme a estudar porque xa había varios anos que deixara os libros polo ciclismo, xusto despois da Selectividade, pero agora lévoo moi ben”, comenta.

Logo de vivir en Pamplona na súa etapa amateur e de correr dun lado para o outro, con numerosas viaxes e pasos por aeroportos na súa andaina como profesional, Martín volve a estar asentado en Rois a tempo completo. Verémolo outra vez sobre a bici nas nosas estradas? “Si, a min gústame saír cos amigos. Aínda que a verdade é que me tomei unha temporadiña longa de descanso para desconectar e o ciclismo saca bastante tempo, así que pode que me veña mellor o atletismo. Teño que volver facer un pouco de exercicio”, confesa.

Os Reis Magos non van estar hoxe na tradicional cabalgata de Rois, pero sí lles mandan unha mensaxe toda a veciñanza de Rois, despois de manter onte moitas videochamadas cos nenos e nenas que quixeron falar con eles. A todos e todas lles recordan que hoxe deben ir cedo para a cama.

Melchor recórdalle a rapazada que a situación do 2020 lles impide acudir a cabalgata, e amosa o orgullo que sinten os Reis Magos coa responsabilidade que amosaron todos os nenos e nenas de Rois durante este último ano.

Gaspar está moi contento de manter as videochamadas cos nenos que onte quixeron falar con eles, e lembralles a todos que lles gustaron moito as cartas que mandaron.

Baltasar, para rematar, dille á rapazada que esta noite deben ir cedo para a cama, e deixarlle algo de comer e bener, tanto aos tres Reis Magos como aos seus camelos.

O alcalde, Ramón Tojo, espera que para o ano poderá haber cabalgata cos Reis Magos, e amósase convencido de que esta noite Melchor, Gaspar e Baltasar deixaranlles regalos a todos os nenos de Rois.

Celadores e alcaldes de barrio actuaron como paxes reais e antes do Nadal xa lles entregaron a todas as familias a felicitación navideña xunto co almanaque de Rois para 2021 e a revista Debullar, na que se recolle toda a información da actividade municipal ao longo do presente ano.

Rosalía de Castro é a protagonista da portada desde número 4 da revista, que se fai eco do mural vexetal que Camilo Seira lle adicou a poeta no multiúsos ou que o Concello de Rois volve colaborar coa Fundación converténdose en mecenas da Casa Museo.

Os vídeos das rutas das Penicias e de Castro Lupario e mais os de apoio ao comercio local, o segundo campionato de España logrado polo piloto de Urdilde Xurxo Neo ou o éxito da iniciativa ‘Rois cociña na casa’ son outras das temáticas que salienta Debullar nesta última edición.

Todo o contido deste número 4 da revista Debullar correspondente ao ano 2020 pode consultarse premendo aquí

Rois celebra en maio as tradicionais festas patronais do Santo Isidro, que este ano tiveron que suspenderse por causa da covid-19. Pasamos confinados a maior parte do mes e logo comezamos a saír por fases. A pandemia non permitiu que houbese xuntanzas ao redor dunha boa mesa como é habitual, pero o Concello non quixo pasar por alto a festividade e puxo en marcha a iniciativa Rois cociña na casa co obxectivo de dar a coñecer a mestría culinaria dos roisenses.

Unha ducia de persoas, de diferentes asociacións, responderon á chamada e metéronse na cociña ao comezo do verán para amosarlle ao mundo, dende a canle de Youtube do Concello de Rois, algunhas das receitas que fan nas súas casas.

A iniciativa, que tivo un grande éxito con centos de visualizacións, plásmase agora nun libro dixital. Nel podemos consultar as catorce receitas, divididas en entrantes, primeiros platos e sobremesas. Non faltan as receitas tradicionais nin tampouco os detalles persoais.

Trátase do primeiro manual de cociña feito pola veciñanza de Rois, cos ingredientes necesarios para eleborar cada plato e como se fan paso a paso. O alcade, no limiar introductorio, sinala que non ten porque ser o último.  

Tedes o libro no arquivo adxunto.